Қызылорда облысының басты дақылы – ақ күріш — Гүлшара Әбдіқалықова

«Сыр күріші – ел ырысы» деген сөз бекерге айтылмаса керек. Тарихи деректерге көз жүгіртсек, Сыр өңіріндегі алғашқы күріш егісі 1896 жылы пайда болған екен. Міне, содан бері күріш өнімін жинау жағынан еліміздегі негізгі аймаққа айналдық. Бүгінде Қызылорда облысы республиканың 90 пайызын күрішпен қамтамасыз етіп отыр десе болады. Бұл туралы Қызылорда облысының әкімі Гүлшара Әбдіқалықова Facebook желісіндегі жеке парақшасында жазды.

Қызылорда облысының басты дақылы – ақ күріш — Гүлшара Әбдіқалықова
Фото: facebook.com

Аймақ басшысының айтуынша, биыл статистикалық мәліметке сәйкес облыста 184,2 мың гектар жерге ауыл шаруашылығы дақылдары орналастырылды. Оның ішінде, негізгі дақыл — күрiштің көлемі 89,5 мың гектар. Егісті әртараптандыру бағытында алғаш рет перспективалы дақылдар — қант құмайы 70 гектарға, соя 240 гектарға, жүгері 1 667 гектарға жеткізіліп, ылғал сақтағыш аквагельдерді пайдалану арқылы 80 гектар богарлы жерлерге күздік бидай егілді.

«Күріштен тау тұрғызған дала еңбеккерлерінің есімдері елге танылды. Ақ күріштің атасы, «Дала академигі», әлемдік рекорд иесі Ыбырай Жақаев кеңестік кезеңде Сырдың ақ маржанын әлемге танытып, туған жер төсіне қайың кетпенімен ерлікке тән еңбек дастанын жазып қалдырды. Даңғайыр диқанның ізбасарлары, ерлермен иық тірестіріп қатар еңбек еткен Сәлима Жұмабекова, Шырынкүл Қазанбаева, Ұлбала Алтайбаева, Жадыра Таспанбетовалар Сыр елінің мақтанышына айналды. Бүгінгі күні де ақ күрішті аялап өсіріп, мол өнім жинап, ел берекесін тасытып жүрген диқандарымыз аз емес. Соңғы жылдары күріштен рекордтық өнім жиналып келген болса, онда диқан қауымының үлесі зор. Соның ішінде еңбек адамдарына тағайындалған 3 дәрежелі «Еңбек Даңқы» орденімен марапатталған күрішші, механизаторлар Ерболат Қалмұратов, Ербол Ақбергенов, Жеңіс Қошқарбаев, Премраз Бекмахановтарды есімдерін атап өтсем деймін», — деп жазды Гүлшара Әбдіқалықова.

Облыста күрішке орақ салу жұмыстары 22 тамыздан басталды. Қазіргі таңда 37 726 гектар күрішке орақ салынып, оның 28 208 гектары бастырылды. Әр гектарынан орташа 49,5 центнерден өнім алынуда.

«Мамандардың болжауынша, биыл да өткен жылғы көлемнен кем болмайды деп отырмыз.

Сала басшыларына егін жинау жұмыстарын 15 қазаннан кешіктірмей толық аяқтауды тапсырдым», — деп жазды аймақ басшысы.

Loading...
Зифа Хабирова -  понедельник, 26 октября в 03:52
Дети «пандемии»: Около 400 тыс казахстанок забеременели в 2020 году