Кәсіпкерліктің дамуы жаңа жұмыс орындарын ашуға мүмкіндік береді. Бүгінде мемлекеттік бағдарламаның тиімділігі арқылы өз бизнесін ашып, табыс көзін еселеп отырған кәсіпкерлер көп. Шиелі ауданы бұл бағытта оң нәтижеге жетіп отыр.
Ауданда бүгінде 4500-ге жуық кәсіпкерлік субъектілері тіркелген. Оның 91 пайызы, яғни 4107-і тұрақты ісін жүргізуде. Ауданда мемлекеттік бағдарлама шеңберінде несие алып, кәсібін бастағандар да аз емес. Биылғы жылдың 7 айында «Еңбек» бағдарламасы бойынша жобалық құны 147 млн.теңгені құрайтын 42 жоба қаржыландырылған.
Мұнан өзге, Ауыл шаруашылығын қолдау қоры мен «Өңірлік инвестииця орталығы» арқылы құны 178,4 млн.теңгені құрайтын 55 жоба қолдау тапқан.
Қайтарымсыз грант алып, іс бастаған кәсіпкерлер де өз бизнесін жүргізуде. Нәтижелі жұмыспен қамтуды және жаппай кәсіпкерлік бағдарламасы бойынша 59 жобаға 14,8 млн.теңгеге қайтарымсыз грант қаражаты берілген. Бұл үшін 53 жас оқу курсынан өтіп, бизнес ашудың жолдарына кіріскен.
Ауданда кәсіпкерлік ширап келеді. Өз бизнесін дөңгелеткен кәсіпкерлер тиімді несие алып, жаңа жұмыс орындарын ашуда.
Айта кетсек, «Еңбек» бағдарламасы басталған 2017 жылдан бері Қызылорда облысы бойынша көптеген кәсіпкерлік жоба жүзеге асырылды. Олардың басым көпшілігі – стартап идеялар. 6 процентпен берілетін несие әсіресе ауыл тұрғындарына тиімді болып тұр. Өйткені кепілге мүлік қою жайы жеңілдетілген.
«Ауыл тұрғындары кепілге жылжымайтын мүлік: ол өзінің тұрып жатқан үйлері болсын, жұмыс істейтін жерлерді болсын, ауыл шаруашылығы техникаларын қабылдаймыз. Егер сіздің мүлкіңіз жетпейтін болса, 15% ақшалай не кепілдік ретінде қойып, қалған 85% мемлекет кепіл бола алады. Сол себептен бұл бағдарламаға қатысушылар көп», — дейді мамандар.
