Ауылды аймаққа келін боп түскен бойжеткен Алматының атақты жезөкшесі болып шыққан. Бұл туралы Maskara.kz-ке сілтеме жасап «NewTimes.kz» ақпараттық агенттігі хабарлайды.
Аталған сайт желлі қолданушыларының бірінің хатын жария еткен. Ондағы мәліметте ауыл жігіті шаңырақ көтеріп, тойға қалыңдықтың алматылық құрбылары келгені туралы жазылған. Осы қуанышты кеште ауылдың тағы бір жігіті сол құрбылардың бірін ұнатып, аяқ асты үйленуге шешім қабылдайды. Келін түсіру туралы үш ұйықтаса да түсіне кіре қоймаған ата-анасы қарызданып, қауқарланып ұлдарының айтқанын екі етпей орындайды.
«Қыз алып қашып келген баланың аты - Жомарт. Жағдайы қораш, ортан қол әулеттен шыққан бала еді. Қала көрмеген, оқымаған. Ауылда әркімге жалданып жұмыс істеп, бар тапқанын әке-шешесіне тасып жүргендердің бірі. Баласы бір түнде келін алып келген соң әке-шешесі шашылып қалды. Үй аралап қарыз сұрап, тойға соятын малды да қарызданып алып, әлек болды. Қолында түгі жоқ адамға той жасау оңай емес. Үлкен қарызға кірді. Байқұс әке-шеше қайтсін, қолдарынан келгенше той жасады. Қатыстық. Көрші болған соң құрметті қонақ болып, төрде отырдық. Тілек айттық. Ер адамдарға ішіп-жеп, сүзіле қарағаны болмаса қыз бала көрікті екен. Аяқ-қолы балғадай, еркек біткен қызығатындай бар. Талайды көрген, беті ашылған қыз секілді. Тым еркін. Той өте салысымен бұтына шорты киіп алып, аяқ-қолын жалаңаштап жүргені бір түрлі көрінді. «Ұят-ай, мұнысы несі?» дескендерге Жомарттың (үйленген жігіт) әке-шешесі: «Қала көрген қыз ғой. Не кисе де жарасады. Қақыларың болмасын» деген» деп жазады басылым.
Қызықтың көкесі жігіттің Алматыда үлкен қызметте істейтін ағасы келген кезде орын алыпты. Тойға іссапарда жүріп келе алмаған екен.
«Ол қақпадан кіріп, үйге енісімен көрші айқай-шу басталды. Кеше ғана босағаны аттаған келін қашып қақпадан шықты. Артында Жомарт «Тоқташы Жанар. Тоқташы деймін. Ағам сені емес, басқаны айтқан болар. Не болсаң да мен сені кешіремін. Кетпеші» деп айқайлап, жалынып қыздың соңынан жүгіріп барады. Жомарттың шешесінің жылағаны, шалының ақырғаны, ағасының боқтығы қаттырақ шыққан соң, көрші біткен сол үйге жүгіріскен. «Келін» деп түсіргеніміз қалада жезөкшелікпен айналысып жүрген қыз екен. Оны Жомарттың ағасы Ғалым айтты. Ол Алматыда үлкен жерде қызмет етеді. «Кей жағдайларды шешіп берші деп, жігіттер ара-тұра саунаға, бильярдқа шақырады. Онда белгілі, тек суға түсіп, арақ ішіп қоймайсың. Жігіттер «аға, алаңсыз демалыңыз» деп қыз шақырады. Інішектер сыйлап тұрған соң, амалсыз демаласың. Талай мәрте саунаға осы қызды ертіп әкеліп қойныма салған еді. Бұл қыз солардың әркімнің қойнына салып, керек етсе, өздері демалып жүрген жезөкшесі. Алматының талай саунасын, қонақ үйін адақтап жүрген атышулы жүргіш қыз. Енді келіп, қала көрмеген, ауылдан шықпаған, дұрыстап қызбен жүрмеген менің ініме түк болмағандай әйел болып кіріп алып отыр. Мен бұған жол бере алмаймын... Ол қыз енді келмейді» деп күйінген Ғалым қолын бір сілтеген» делінген жазбада.
Бұл оқиғаны қағаз бетіне түсірген автор бүгінде мұндай оқиғаның көптеп орын алып жатқанын, сол себептен жігіттерге сырын білмей, қыз алып қашуды доғару қажеттігін ескертеді.
