Маңғыстаулықтар асыға күткен «Aktau Open Fest 2016» фестивалі басталды

Ашылу салтанатында ақтаулықтар Тамара Асар, Нұрлан Өнербаев сынды танымал әншілердің өлеңдерін тамсана тындап, соңында гала концертке күә болды.

«Aktau Open Fest » фестивалі төртінші рет өткізілуде. Бұл шараны ақтаулықтар асыға күткен болатын. Алғашқы күні теңіз жағасына жиналғандар көп болды. Биылғы шара Тәуелсіздіктің 25 жылдығына арналып өткізілуде. Ұйымдастырушылар 3 күн бойы қала халқына қуанышты көңіл-күй сыйлауға дайын екендерін айтып те үлгерді.

Фестивальдің бірінші күні облыс әкімі Алик Айдарбаев келіп, жұртшылықты аталмыш шараның ашылуымен құттықтады.

«Бүгін дәстүрге айналған «Ақтау опен фест» фестивалін өткізгелі тұрмыз. Шараның ауқымы жыл сайын кеңейіп келеді. Бүгінгі шараның негізгі мақсаты салауатты өмір салтын қалыптастыру, көпшілікті спортпен шұғылдануға насихаттау, өскелең ұрпаққа үлгі көрсету», — деді Маңғыстау облысының әкімі.

Гала-концерттің алғашқы шымылдығын Әділ Ахметов пен Тамара Асар ашты. Өткен жылы ресми тілде болса енді, фестиваль ұлттық нақышқа ден қойып отыр. Ерекшелігі де осы.  Шара аясында  5-томдық «Тіл таңбалы ақындар» атты кітаптың тұсаукесері өтті. Мұнда Маңғыстаудың ақын жырауларының еңбектері жинақталған. 18-ші ғасырдан бастап бүгінгінің тұлғаларына дейін бар.  Бұл тарих, болашаққа қалатын мұра. Сондықтан ақтаулықтар жинақтың фестиваль аясында жарық көргеніне қуанды.

Мереке қазақстандық эстрада және жергілікті жұлдыздардың концертімен жалғасты. Алғашқы күні Сүндет Байғожин, Нұрлан Өнербаев, Тамара Асар өнер көрсетті. Арнайы шақыртылған қонақтардың айтуынша мұндай фестивальдің жастарға берері мол.

Фестивальдің алғашқы күні сәтті өтті дейді келушілер. Бүгін және ертең де ақтаулықтар кешқұрым теңіз жағасына жиналатын болады. Күндіз де көпшілік шаралар қаланың әр бөлігінде өткізіледі. Бірі - қолөнер бұйымдарын жәрмеңкеге шығарса, енді бір топ брэк биінен жарысады. Баскетбол, ұлттық ойындар ойналады.  Ең ауқымды шараға кез-келген ниетті тұрғын қатысуына мүмкіндік бар.