Жәрмеңке «Агрофест» ауыл шаруашылығы фестивалі аясында ұйымдастырылды, деп хабарлайды NewTimes.kz.
Биыл, Оңтүстік дәнді-дақылдарды жинау науқанының сәтті аяқтады. Тынымсыз еңбектің арқасында бидай мен арпаның әр гектарына 18 центнерден өнім алып, қамбаны 400 мың тоннаға жуық астықпен толтырды. Сондай-ақ, 116 мың тонна жеміс-жидек, 919 мың тонна көкөніс, 1,3 млн тонна бақша дақылдарын жинады. Бағбандар тамшылатып суару әдісін 7500 гектарға ендіріп, жалпы көлемін 58 мың гектарға жеткізді. Бұл республикалық үлестің 72 пайызын құрады. Бұл туралы, облыс әкімі Жансейіт Түймебаев ауылшаруашылық саласының мамандарына алғыс айта, мәлімдеді.
Өңірде тұңғыш рет өткізілген «Агрофест» фестивалі аясында ауылшаруашылық өнімдерінің жәрмеңкесі өтті. Шараға облыстың 15 аудан — қаласы өз өнімдерін ұсынып, нарықтағы бағадан 30 пайызға төмендете сатты. Қазығұрт ауданы жәрмеңкеге 5 тонна ет өнімдері мен 1 тонна жеміс – жидек әкелді.
Қала тұрғындары таңертеңнен жәрмеңкеге жетуге асықты. Себебі, мұндағы баға қалтаға қонымды. Мәселен, қой еті 900 теңгеден сатылса, картоп 55 теңгеге дейін төмендетілді. Ауқымды шара аясында дәстүрлі әндер шырқалып, ұлттық ойындар ел назарына ұсынылды.
