Шымкенттегі Абай ауданында 300-ге жуық аз қамтылған отбасы тіркелген. Оларға осы аудандағы жомарт азаматтар мен қайырымды жандар жыл бойы қаржылай және материалдық көмектер көрсетіп келеді.
Бизнестің әлеуметтік жауапкершілігі аясында жүзеге асырылып жатқан жұмыстар туралы Абай ауданы әкімдігінің халыққа әлеуметтік қолдау көрсету бөлімінің басшысы Меруерт Тұтқышбаева айтып берді.
– Абай ауданы әкімінің орынбасары Гүлсара Ташимованың бастамасымен жыл басынан бері 39 қайырымдылық шарасы өткізілді. Оның аясында 834 отбасы қамтылды. Аталған игі істің шарапатын көргендер – ҰОС және тыл ардагерлері, көп балалы аналар мен тұрмысы төмен отбасылар. Сонымен қатар тұл және жартылай жетімдер, дертке шалдыққан, сондай-ақ, зорлық-зомбылыққа ұшыраған азаматшаларға да материалдық көмек көрсетілді. Қаржылай және азық-түлікпен көмек беру - жыл бойы тоқтаусыз жүргізіліп отыратын процесс, - дейді бөлім басшысы.
Қайырымдылық шарасында аудандық әкімдікке қалалық маслихат депутаттары мен кәсіпкерлер көмек қолын созып, игі істен қалыс қалмайды. Тек аттарын атамауды өтінеді.
Мейірім шуағы» қайырымдылық қоры мен «Су ресурстары-Маркетинг» мекемесі өздерінің 20 жылдық мерейтойы қарсаңында «Қайырымды 20 іс» акциясын өткізіп, аудандағы тұрмысы төмен отбасыларға көмектесті. Мешіт имамдары да игілікті шарада белсенді. Енді осы отбасыларға жоғарыда айтылған азаматтар алдағы жаңа оқу жылына «Мектепке жол» акциясы барысында да көмектеспек, - дейді әкімдік қызметкерлері.
Айта кетейік, Шымкентте жыл сайын жаңа оқу жылы қарсаңында «Мектепке жол» акциясы ұйымдастырылып келеді. Жоба аясында қала әкімдігінен бастап бүкіл кәсіпкерлер, қайырымдылық қорлары, мешіттер мен шіркеулер де әлеуметтік аз қамтылған отбасылардың балаларын киіндіріп, мектепке қажетті құрал-саймандармен қамтамасыз етеді.
