19 жастағы Әли Ибрагим Қызылордада «Алтын жебе» атты садақ ату орталығын ашты. Бұл орталықтың жұмысын жүзеге асыру үшін Әли Тыныштықұлы «Еңбек» нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған мемлекеттік бағдарламасы аясындағы «Жас кәсіпкер» жобасы бойынша грант жеңіп алды.
Ұлттық спортты насихаттау мақсатында жұмысын бастаған орталықта Әли әзірге жалғыз жаттықтырушы. Оның садақ ату өнерімен айналысқанына небары 1 жыл. Соған қарамастан, ұлттық спорт түрі бойынша бірқатар жарыстарға, шараларға қатысып жүр. Мәселен, ол Алматыда өткен «Ұлы дала – көшпенділер әлемі» халықаралық фестиваліне, Елордада өткен «Nur-Sultan Ethno Fest» фестиваліне белсене қатысты. Сонымен қатар, Түркияның Стамбул қаласында өткен «7. Fetih Kupası» шарасына қатысып, ұлттық спорт түрі бойынша шеберлігін сынап қайтты. Сондай-ақ, жас спортшы ат үстінде садақ ату спортына да қатысады. Оған қоса бұған дейін жамбы ату бойынша жаттығып, машықтанғанын жеткізді ол. Биыл ересектер арасында өтіп жатқан V ҚР Чемпионатының қатысушысы.
«Ұлттық спорт түрлеріне бала кезімнен бері қызығып келемін. Дегенмен, біздің қаламызда жаттығу жасайтын мүмкіндік болмады. Бастапқыда әкем бокс үйірмесіне жіберген болатын. Онда 2 жыл жаттығып, 7 сыныптан кейін спорт бағытындағы мектеп-интернатта оқыдым. 9 сыныпты тәмамдағаннан кейін колледжге оқуға түстім. Оқуды аяқтаған соң Нұр-Сұлтан қаласына жұмыс істеуге бардым. Онда Юнус Эмре институтының садақ ату курсына жазылдым. Садақ атудың қыр-сырын сол жерден үйрендім. Енді туып-өскен жерімде осы спорт түрін насихаттауға кірісіп жатырмын», - дейді Әли Ибрагим.
«Садақ ату үйірмесіне келушілер қатар көп», - дейді жас кәсіпкер. Үйірмеге 7 жастан асқан ер балалар мен қыз балалар, ересектер қатыса алады. Садақ атудың адам ағзасына тигізер пайдасы ұшан-теңіз екенін, осы спортпен шұғылдану барысында бұлшықеттер мен тыныс алу, жүрек-қан тамырлары жүйесінің жұмысы жақсаратынын айтты жас кәсіпкер әрі спортшы.
Ағымдағы жылдың 27 қазанында өткен «Startup weekend» бизнес-жобаларды қалалық іріктеу байқауы бойынша «Алтын жебе» жобасы 1 орынды иеленді.
