Шымкенттік полицейлер арнайы операция өткізді, деп хабарлайды NewTimes.kz ақпараттық агенттігі.
Ұялы телефон сатушылардың ошағына айналған «Гарант» дүкенінде полицейлер тазалау жүргізді. Шенділер дүкен аумағын қоршауға алып, сатушыларды ұстап әкетті. Алайда бұл жағдайға қатысты құзырлы органдағылардан қандай да бір пікір алу мүмкін болмады. Айта кетерлігі, аталған дүкен он жылдан астам уақыттан бері ұялы телефон алып-сатарларының мекені болып келеді.
Жергілікті билік бірнеше рет рейдтік шара жүргізіп, заңсыз сауда жасаушыларға ескерту беріп келгенімен оларды ешкім тоқтата алмады. Ерекше атап өтерлігі, мұндағы саудагерлердің басым көпшілігі қысқа балақты, сақалдылар. «Гарант» дүкені қаланың ортасында орналасқан. Оған жақын маңда «Мега» орталығы мен елімізге танымал ОҚМУ жоғары оқу орны, қалалық әкімдік ғимараты бар.
