Сіздің жұмысыңыз ерлік — Гүлшара Әбдіхалықова полиция қызметі туралы

Бүгін полиция қызметкерлерін кәсіби мерекелерімен құттықтай отырып, Қызылорда облысының әкімі Гүлшара Әбдіқалықова олардың жұмыстары батыл болғандығын атап өтті.

Сіздің жұмысыңыз ерлік — Гүлшара Әбдіхалықова полиция қызметі туралы
Фото: inform.kz

Аймақ басшысының айтуынша, полиция қызметкері болу оңай емес, бұл әрі маңызды, әрі жауапкершілігі мол жұмыс. Ол үшін байыпты білім мен айбарлы жүрек, сабыр мен төзім, қажырлы күш-қайрат қажет. Халық сенімі — полиция қызметіне берілетін басты баға.

««Бізге жаңа формацияның полицейлері қажет. Кадрларды іріктеу, даярлау және ілгерілету жүйесі қайта қарастырылатын болады», — деп Елбасы Нұрсұлтан Әбішұлы Назарбаев айтқандай қазір полицейлердің әлеуетін көтеруге ерекше маңыз берілуде. Қазақстан полициясы – еліміздің қоғамдық қауіпсіздігі мен тыныштығын, азаматтардың еркіндігі мен конституциялық құқықтарын қорғайтын, тәртіптілікті қамтамасыз етіп, қылмыстың жолын кесетін мемлекеттік жүйе. Сіздердің кәсіптеріңіздің қаншалықты қиын, тіпті кей жағдайларда аса қауіпті де екендігі де белгілі. Бүгінгі күні небәрі 25 жасында жәбірленушіні құтқарам деп ерлікпен қаза тапқан учаскелік полиция инспекторы, полиция лейтенанты Талғат Қозыбаевтың, биылғы төтенше жағдай кезінде 4 баланы өрттен құтқарған жедел уәкілдер, полиция капитаны Әлімжан Әлімбетов пен полиция аға лейтенанты Бейбарыс Қалымбетовтердің бейбіт күнгі ерліктері көпке үлгі болып қалды», — деді Г. Әбдіқалықова.

Атап өткендей, мемлекет басшысы Қасым-Жомарт Кемелұлы Тоқаев та полиция қызметкерлеріне ерекше ықылас танытып, жан-жақты қолдау көрсетіп келеді. Мемлекет полиция қызметін заманауи, оның ішінде цифрлық технологиялар негізінде материалдық-техникалық базасын жақсартуда.

««COVID-19» індетімен күрес кезінде де қызметтеріңізге адалдық танытып, сын-сағаттарда өздеріңізге төнген қауіп-қатерді елемей, уақытпен санаспай атқарып жатқан қызметтеріңіз үшін Сыр елі халқы атынан зор ризашылығымды білдіремін. Әрдайым анттарыңызға адал болып, ел қорғаны деген атаққа лайықты абыройлы еңбек ете беріңіздер! Сіздерге мықты денсаулық, шаңырақтарыңызға шаттық, елімізге тыныштық тілеймін! Жақындарымызға жанашыр болайық! Біз біргеміз!», — деді Г. Әбдіқалықова.

Loading...