ҚР Президенті Н.Назарбаев «Қазақстанның үшінші жаңғыруы: жаһандық бәсекеге қабілеттілік» Жолдауында қала мен ауылдық жердегі мектептер арасындағы аражігін жоюды тапсырды. Жалпы, Елбасы үнемі білім саласына ерекше көңіл бөледі. Бұл әсіресе аудандар мен шалғайдағы ауылдардың көтерілген әлеуетінен айқын аңғарылуда, деп хабарлайды ИА «NewTimes.kz».
Мұндай қамқорлықтан Қызылорда облысының Қармақшы ауданы да қалыс қалып жатқан жоқ. Өткен жылы барлық инженерлік инфрақұрылымдары тартылып, пайдалануға берілген «Тәуелсіздік» мөлтек ауданында бүгін 300 орындық Ү.К.Томанов атындағы №183 орта мектептің іргетасы қаланды. Салтанатты шараға қатысқан аудан әкімі Сұлтан Мақашов білім саласына көрсетіліп жатқан қолдауларды және ауданда атқарылып жатқан игі істер жөнінде айта келе, мектеп құрылысының жұмысына сәттілік тіледі. Сонымен қатар жиында аудандық ардагерлер кеңесінің төрағасы Қ.Есдаулетов пен ауданның Құрметті азаматы О.Сариев сөз алып, бүгінгі қуанышпен жиналған жұртшылықты құттықтап баталарын берді.
Жалпы құны 789,932 млн. теңгені құрайтын нысанның құрылысына тапсырыс беруші облыстық құрылыс, сәулет және қала құрылысы басқармасы. Құрылысын салатын бас мердігер «Аман Құрылыс» ЖШС-і. Жоба бойынша 300 орындық ғимаратта оқу бөлмелері, мәжіліс залы, асхана, спорт залы, шеберханалар, зертханалар, медпункт, жабдықталған компьютер класстары, оқу залы бар кітапхана болады.
Айта кетейік, Ү.К.Томанов атындағы №183 орта мектептің ірге тасы 1966 жылы қаланған. Білім ошағында 57 педагог 352 оқушыға дәріс береді. Ұзақ жылдар бойы уақыт талабына сай келмейтін ескі ғимаратта білім берудің қиындығын бастан кешірген мұғалімдер, енді жаңа мектепте, жаңа жағдайда өз жұмыстарын бастайтын болады.
