Орал өңіріне «Нұр Отан» партиясы жанындағы «Жас Отан» жастар қанатының төрағасы Данияр Сүндетбаев келді. Ол аудан ауылдарға барып, жастармен жүздесті.
Кездесу барысында ол осыдан он жыл бұрын кішігірім үйірмеден басталған ұйым бүгінде ауқымды қозғалыс дәрежесіне жетіп, үлкен саяси күшке айналған «Жас Отан» жастар қанатының бүгінгі тыныс-тіршіліг туралы әңгімеледі. Еліміздің жалынды жастарының дені «жасотандықтардың» қатарында екенін айтып, Елбасының тапсырмасына сай кез келген жаңашылдықтан тайсалмай, қоғамдық өзгерістерге дайын болуы керектігін жеткізді.
Ақжайық ауданында болған кезде «Өркен» коворкинг орталығына атбасын тіреді. Жылға жетпейтін уақыт ішінде біраз тың, мазмұнды істердің ордасына айналған «Өркеннің» жұмысымен қызыға танысып, ауданның қыз-жігіттермен Елбасының жаңа Жолдауы жайында әңгімелесіп, пікірлесті.
«Жасотандықтар» жүзеге асырған «NURINTECH», «Сәтті қадам», «Жастар – Отанға» жобаларына батысқазақстандық жастардың белсене қатысқаны да сөз болды. Данияр Манарбекұлы партия бастамасымен қолға алынған «English for Jastar» жобасы туралы да баяндады. Ауданда Ж.Досмұхамбетов атындағы педагогикалық колледжнің студенттері, жас волонтерлар Үмітханым Сайлау мен Эльвира Амангелді қолға алған ағылшын тілін үйрету курсының тынысымен танысты.
Ауылдық округтерден жиналған жастармен болған жүздесуде Д.Сүндетбаев оларға болашаққа көз жүгіртіп, дәуірдің талабына сай ізденіспен биік межелерге қол жеткізу жайында әңгімеледі, сұрақтарға жауап қайтарды. Содан соң ол гитарамен жастармен бірге ән шырқады.
Ернар ХАЙДАР,
Батыс Қазақстан облысы
