Танымал блогер, гинеколог-эндокринолог Балнұр Қошанова әлеуметтік желідегі парақшасында отбасындағы зорлық тақырыбына қатысты ойымен бөлісіп, оқырмандарының ашуын тудырды, деп хабарлайды Skifnews.kz ақпарат порталы.
Дәрігер Instagram-да жариялаған видеосында «әйел 5000 сөз айтса, күйеуі 20 сөз ғана айтады, сөздік қоры таусылған соң жұдырық ала жүгіреді» деген пікір айтқан еді. Сондай-ақ блогер көзінің неге көгергенін түсіндірді.
«Кеше бір процедура жасаған едім. Содан бетімнің көгергені кетпеген. Менің аудиториям түсінгенімен, сырттан келгендер түсінбей жатыр. Дұрыс мен сіздерге «таяқ жеп шыдаңдар» деп үгіттеп жатқан жоқпын. Бірақ шыдағанша шыдаңыз. Алланың ең жек көретіні - ажырасу.
Сіздердің араларыңызда не болғанын мен де, ата-аналарыңыз да, психологтар да білмейді. Тек сіздер білесіз. Әйелдің аузынан 5 мың сөз шықса, ер адамнан 20 ғана сөз шығады, сол сөз таусылғанда жұдырығын алып жүгіреді. Ол бекерден бекер ұрмайды ғой, әр нәрсенің себебі бар. Ал ортадағы бала ше? Жартылай жетім болып өскен бала бақытты болып өсе ме?» — дейді ол видеода.
500 мың-нан аса оқырманы бар блогер-дәрігердің видеосы оқырмандарының ашуын тудырып, көбі көңілі қалғандарын айтып жатты.
«Бишимбаев пен Салтанат бакытты болды ма? Шыдап»,
«Сіз ажырасып жалғыз бақытты болмайсыз деген сөзіңізге келісе алмаймын.Ойткені бақытты болу күйеуі бар жоқ дегенге қарамайды»,
«Маған қызық осындай оқыған әйелдер осылай әңгіме айтып отқаны. Сен таяқ жемей-ақ, ол ұрмай-ақ, Нормалный Отбасы болуға болмай ма?»,
«Маскара , еркектин ісін ақтап отырсыз ба!!! Одан да тақырыпты жауып қоя салсаңызшы, ұятқа қалмай!!! Сіз үшін мен ұялып отырмын!»,
«Сонда ұрып, зақым келтіріп жаткан адамды Алла жақсы көрип отырады ма сіздің ойынызша? Не айтып отырсыз вообще? Сіз сиякты адамдардың арқасында баска мұсылмандарды надан кореді ғой», — деп жазды оқырмандары.
Оқырмандарының наразылығынан кейін блогер артынша қайтадан видео жариялап:
«Мен өлтіріп көк ала қойдай еткенше шыдаңдар демедім, өкінішітісі көпшілік солай түсініпті… Менің шыдамың жеткенге ШЫДА деген сөзіме біраз хейт кетіпті… Бірақ, еске түсірейікші! Таяқ жеген кезде, тыныш отырған жеріңнен әй жоқ-шәй жоқ жұдырығын ала жүгірген жоқ қой?» — деп тағы да ойын қостап жазды.
