Олардың қатарына жазғы демалыс базалары да қосылды. ШҚО кәсіпкерлері палатасының директоры Қайрат Мамырбаевтың мәліметтері бойынша, Шығыс Қазақстанда әлеуметтік-экономикалық қызметпен айналысатын 516 нысанға Ashyq жобасына қатысу үшін QR-код берілді.
Бұл жүйеге сонымен қатар мемлекетік ұйымдар, білім беру мекемелері мен туристік нысандар белсене қосылуда. 83 кәсіпорын жобаға өз еркімен қосылса, 73 кәсіпорын қазір тестілеу режимінде. Отыз нысан өңірдің жасыл/сары аймақта орналасуына байланысты о бастан бұл жобаға қатысудан бас тартқан.
«Еріктілер арасында мемлекеттік мекемелердің белсенділігі арта түскенін айта кету керек, — деп атап өтті Қайрат Мамырбаев. – Бұл – департаменттер, әкімдіктер басқармалары мен олардың коммуналды мемлекеттік кәсіпорындары, әскери бөлімшелер, білім мекемелері, қылмыстық-атқару жүйесінің мекемелері. Сондай-ақ коронавирус инфекциясының таралуына жол бермеу мақсатында облыстың көптеген демалыс базалары да осы жобаға ерікті түрде қатысуға ниет білдірді».
Аймақтық кәсіпкерлер палатасында айтқандай, жобаға Өскемен, Семей, Риддер, Курчатов қалаларындағы және барлық аудандарда орналасқан бизнес нысандары қатысады. Туристік нысандарға келсек, Алакөл жағалауындағы 26 демалыс базасы QR-код алды. Алтай ауданында он демалыс базасы QR-код алса, тағы төрт кәсіпкер келісімді тосып отыр. Демалушылар ең көп баратын Катонқарағай ауданында әзірге бір-ақ демалыс базасы Ashyq жобасына қатысады, тағы біреуі қорытындыны тосуда.
Жоба бойынша жұмыс істейтін нысандарға келушілер Ashyq қосымшасынан басқа Aitu, Kaspi.kz платформаларын да пайдалана алады. Таяу уақытта тағы бірнеше қазақстандық банк QR-кодты қолдануға болатын өз қосымшаларын іске қосуды жоспарлап отыр.
Тағы бір жағымды жаңалық, Ashyq жобасы бойынша балалардың жабық ойын-сауық орталықтары да балақайларды қабылдай алады. Мамыр айының соңында орталық қожайындары Қазақстан Президентіне бейнеролик арқылы өз өтініштерін білдірген болатын. Соның нәтижесінде еліміздің Бас мемлекеттік санитарлық дәрігерінің 2021 жылғы 3-маусымдағы №26 қаулысына сәйкес, бизнестің бұл нысандарына бір балаға он шаршы метр аумақты қамтамасыз еткен жағдайда жұмыс істеуге рұхсат берілді.
«Бір жылдан асты, балаларымызды ешқайда апара алмаймыз. Мектепке де жөнді барған жоқ. Үнемі үйде отырудан іштері пысты. Оның үстіне жадырап жаз келді, олардың аңсары далаға ауып тұрады. Балалардың жабық ойын-сауық орталықтарының қызметіне Ashyq жобасы ойынша рұхсат етілгені біз үшін үлкен қуаныш. Алдағы демалыс күндері отбасымызбен ойын-сауық нысандарына барып, көңіл көтерсек дейміз», — деп бөлісті бізбен өзін Айша деп таныстарған көп балалы ана.
