Мемлекет дамуының бір көрсеткіші білім саласы. Еліміз тәуелсіздік алған 30 жыл ішінде Шығыс Қазақстанда жалпы саны 171 білім беру нысаны салынған. Олардың ішінде 144-і мектептер болса, 27-сі балабақша.
«Күш – білімде» қазақ даналығы осылай дейді. Елдің ертеңі болар жастарға бүгінде білім саласында көптеген қолдау көрсетілуде. Әсіресе, қазіргі заман талабы болған ІТ, робототехника-инженерия сияқты бағыттар өзгелерден көш ілгері тұрғаны белгілі. Сол себептен, болашақ техниктерді осы сәттен дайындау маңызды. Шығыс Қазақстан облысында бұл тарапта жемісті жұмыстар жетерлік. 2017 жылы қолға алынған «Туған жер» акциясы негізінде аймақтағы бірқатар мектептер жаңаша жаңғыртылды. Оған демеуші болған өңір азаматтары еді. Қолдауға дайын жерлестеріміз жалпы сомасы 2,8 млрд теңге қаражат жиып берген.
Шығыс Қазақстан республика бойынша жүзеге асырылған жоба аясында 655 мектепте ІТ сынып ашып, көш бастаған. Солардың қатарында Өскемендегі Зәки Ахметов атындағы №16 орта мектеп бар. Білім ордасы директорының айтуынша, мектепте бірнеше сынып заманауи талаптарға сай етіп жасақталған. Оқушылар игілігін көріп отыр.
«Менің мектебім жобасы аясында биология, робототехника кабинеттері жабдықталды. Бұл балаларымыздың қарымын одан әрі дамытып, қызығушылығын оятуда да өзіндік септігін тигізетіні сөзсіз. Түрлі жарыстарда да оқушыларымыз топ жарып жүргені көңіл қуантады. Білікті ұстаздар қауымы мен заманауи білім беру әдісі тоғысқанда балаларымыз зор жетістіктерге жетері анық», - дейді мектеп директоры Гүлзиқан Сауырбаева.
ІТ сыныптарда білім беретін 1023 мұғалім екі жыл ішінде арнайы курстан өткен. Нәтижесі - соңғы жылдары шығысқазақстандық оқушылар облыс әкімінің қолдауымен өткен стартап жобалар сайыстарында жеңіске жетіп, 24 млн теңгеге жуық қаражатты жеңіп алған.
