Риддерде Ashyq жобасын қолданушылардың саны артып келеді

Шығыс Қазақстан облысындағы Риддерде Ashyq жобасын қолданушылардың саны артып келеді. Бұл жергілікті кәсіпкерлерге «қызыл» аймақта жұмыс істеуге мүмкіндік береді. Бүгінде Риддердің 19 кәсіпкері Ashyq жобасына қатысуға ниет білдірген. Олардың 17-сі QR кодтарын алды, ал 3 бизнес нысаны тестілеу режимінде жұмыс істейді. Жобаға қосылғандардың көпшілігі тамақтану нысандары.

Михаил Запорожский - мейрамханасының меңгерушісі: «Адамдар қазірдің өзінде бұл жобаға үйреніп қалды. Көбісі мейрамханаға келерде QR кодын бірден автоматты түрде көрсетеді.Ешқандай қиындық тудырмайды. Біз үшін бұл өте ыңғайлы, біріншіден, инфекция қаупін болдырмайды. Келушілер коронавирусты және басқа да ауруларды жұқтырмайды деп сенімді түрде айта аламыз. Елдегі жағдайдың тұрақталуына септігін тигізеді»

Мейрамханалардың тұтынушылары төлем бағдарламасы арқылы Ashyq қызметін пайдалана алады. Оны қолдану үшін мекеменің кіреберісінде орнатылған QR кодын онымен сканерлеу қажет. Осыдан кейін смартфон экранында кіруге рұқсат беретін немесе оны шектейтін белгі көрсетіледі. Негізінен қоғамдық тамақтану орындарына «жасыл» немесе «көк» мәртебесі бар келушілер ғана кіре алады. Әзірге құқық  бұзғандар жоқ дейді мамандар.

«Қазір бұрынғыдан қарағанда жақсырақ. Көбісі бұл жобамен таныс. Яғни, қосымша арқылы мейрамханаға кіріп шығу жеңіл. Ал, басында шыны керек қиындау болды. Әр келушіге түсіндірме жұмыстарын жасайтынбыз. Бәрінің ұялы телефондарына тіркеп көп уақыт жоғалтатынбыз. Ол кезде бізде күзетші де болмаған еді.  Әр келушінің сұрақтарына жауап беріп одан кейін ғана мейрамханаға кіргіздік» дейді тәжірибелі әкімші Екатерина Кравченко.

Барлық шектеу шаралары бизнеске айтарлықтай шығын келтірді. «Ashyq» - қиын жағдайдан шығудың жалғыз мүмкіндігі, дейді дәмхана қызметкерлері.

«Шығыс Қазақстан облыстық Кәсіпкерлер палатасының Риддер қалалық  филиалының директоры Данияр Мұхтаровтың айтуынша  «Atameken» дәл осы «Ashyq» жобасын түсіндірумен айналысады, кәсіпкерлерге сапаны бақылау департаменті арқылы сәйкестік актісін алуға көмектеседі.  «Ashyq» - бұл шектеу шараларының критерийлерін білдіреді, яғни, егер аудан немесе қала «сары» аймақта болса, онда «Ashyq» жобасы арқылы жұмыс істейтін кәсіпорындар «жасыл» аймаққа сәйкес еңбек ететін болады. Кәсіпкерлер бізге жүгінеді. Бәріне көмектесеміз», - дейді сала өкілдері.

Қазір Ashyq қосымшасына тіркелгісі келетін кәсіпкерлер көбейіп келеді. Олардың қызығушылығы түсінікті: ешкім шығынға батқысы немесе бизнесін жоғалтқысы жоқ. Барлығы бірдей кәсібін дөңгелеткісі  келеді дейді кәсіпкерлер палатасының жергілікті филиалының өкілдері.