Ағымдағы жылдың 17 шілдесі күні Талдықорған қаласы Тіл сарайында Қазақстан халқы Ассамблеясының рухани жаңғыру бағдарламасын іске асыру мәселелері бойынша этномәдени бірлестіктердің өкілдері мен өңірлік «Қоғамдық келісім» мекемелерінің қызметкерлеріне арналған республикалық семинары өтті, деп хабарлайды ИА «NewTimes.kz».
Іс-шараға ҚХА Төрағасының орынбасары – Хатшылық меңгерушісі Дархан Мыңбай, Алматы облысының әкімінің орынбасары Жақсылық Омар, ҚХА мүшелері, мемлекеттік органдардың, этномәдени бірлестіктердің, «Қоғамдық келісім» КММ, БАҚ өкілдері және т.б. қатысты.
«Бүгінде әр өңірдегі қоғамдық сананы жаңғырту жөніндегі жобаларға ҚХА-ның қатысу жоспары әзірленген. Ол 593 іс-шараны қамтиды және «Рухани жаңғыру» бағдарламасын іске асыру бойынша жалпыұлттық «жол қартасы» болады. Бұл құжаттардың барлығы да өңірлік ассамблеялар хатшылықтарының, «Қоғамдық келісім» коммуналдық мемлекеттік мекемелерінің тұрақты бақылауында болады. Мен «Қазақстанның 100 жаңа есімі» жобасына арнайы тоқтағым келеді, оның маңызы зор. Мемлекет басшысы айтқандай, бұл жобаның «Ассамблеяға тікелей қатысы бар». Қоғамға халқытың 21-ғасырдағы бет-бейнесін адамгершілік тұрғыдан айқындайтын беделді тұлғалар керек», — деді өз сөзінде Дархан Мыңбай.
Семинарға қатысушыларға «Қазақстанның 100 жаңа есімі», «Туған жер», «Қазақстанның киелі жерлерінің географиясы» жобаларын іске асыруға ҚХА белсенділерін тартуға, діни экстремизмға қарсы Ассамблеяның медиативті рөлін күшейтуге, ҚХА Қоғамдық келісім кеңестерінің қызметін рухани жаңғыру мәнмәтінінде кеңейтуге және т.б. бағытталған ғылыми-әдістемелік және консультациялық қолдау көрсетілді.
Сондай-ақ семинар шеңберінде «Қазақстанның мәдени мұрасы» жобасының таныстырылымы, «Медиация – жаңа ой-сананы қалыптастыру тәсілі», «Заманауи бизнес модельдеу» тренингтері өтті.
Іс-шара барысында ҚХА ғылыми-сарапшылық кеңесінің мүшесі, Л.Н.Гумилев атындағы ЕҰУ профессоры Нұрбек Шаяхметов, «новые решения» білім қорының жетекшісі Вячеслав Ким, ҚХА мүшесі, Астана өзбек этномәдени бірлестігінің жетекшісі, Рухани жаңғыру бойынша ұлттық комиссияның мүшесі, кәсіби медиатор Шерзод Пулатов, ҚХА мүшесі, Жезқазған қаласы Қоғамдық келісім кеңесінің төрағасы, меценат Бекзат Алтынбеков, Адамды кешенді дамыту академиясының жетекшісі, бизнес-тренер Вячеслав Попов күн тәртібіндегі мәселелер бойынша дәріс оқыды.
Семинар аясында республикамыздың өзге өңірлерінен келген «Қоғамдық келісім» мекемелерінің қызметкерлері Алматы облыстық «Достық үйі – қоғамдық келісім орталығын» аралап, қазақ тілін оқыту, медиация кабинеттері және этномәдени бірлестіктердің жұмыстарымен танысты.
