Көшеге есімі берілген азаматтың баласы кәсіпкер. Бұрын сол ауылда бірнеше жыл әкім де болған, деп хабарлайды Экспресс К.
Қызылорда облысына қарасты Төретам ауылында қазір Сисен Үйреков атында көше бар. Бұл көше бұрын ұлт-азаттық көтерілістің басшысы болған ерен тұлға Амангелді Имановтың есімімен аталған.
Ал Сисен Үйрековтың баласы Кенжебек Үйреков дәл осы Төретам ауылын бірнеше жыл басқарған екен. Кейін облыстық мәслихат депутаты болыпты. Ауыл тұрғындары қазір экс-шенеунік аудандағы қалталы кәсіпкерлердің бірі екенін айтады.
Әкімдіктегілер Иманов көшесінің атын Үйрековке ауыстыруға өздері шешім шығарғандарын растады. Бірақ бұл шешімді қабылдауға Сисен Үйрековтың баласының кәсіпкер болғаны мүлде әсер етпеді дейді.
Олардың айтуынша бұрынғы Амангелді Иманов көшесі (қазіргі Үйреков) өте тар болған. Сондықтан ұлт-азаттық көтеріліс басшысының есімін ауылдағы үлкендеу көшеге бердік дейді.
«Қармақшы аудандық мәслихаты мен аудандық әкімдіктің 2004 жылғы 30-қыркүйектегі кезекті 11 сессияның шешіміне сәйкес Төретам кентіндегі көшелерге «Амангелді Имановтың» және «Сисен Үйрековтің» есімдері берілгенін жеткіземіз», — деп мәлімдеді әкімдіктегілер.
Яғни қазір ауылда Имановтың да, Үйрековтің де атымен аталатын көшелер бар. Сондай-ақ әкімдіктегілер Сисен Үйрековтың ұлы отан соғысының ардагері болғанын және осы ауылдың тумасы екенін айтады.
