Отбасылық өмір жолдары өнерден бастау алып, қазіргі таңда шаңырақ көтеріп, отау құрған жандар жетерлік. Солардың бірі Шығыс Қазақстан облысындағы Глубокое ауылында тұратын Ақметқалиевтар әулеті. Отыз жылдан астам уақыт бойы ән көгінде әсем туындыларын қалықтатып жүрген өнерлі жұп бүгінде көпке үлгі.
Береке бірлігі жарасқан мерейлі отбасы мүшелерінің барлығы да өнерге жақын. 90-шы жылдардың басында сонау Тарбағатай ауданынан қоныс аударған Ақметқалиевтар отбасы ел жұрт қызыға қарайтын өнерпаз әулетке айналды. Отағасы Құмархан мен отанасы Анаргүл екеуі өмірге Әнуар, Мадияр, Іңкәр, сынды үш перзентті дүниеге әкелген. Бүгінде ұлдарынан тараған немерелердің қызығын көріп отыр. Бұл әулеттің ұл-қыздары да өнерден кенже қалмаған. Бірі халыққа асабалық қызмет көрсетсе, енді бірі дәстүрлі ән орындаушысы. Ал кенжелері Іңкәр Өскемендегі ағайынды Абдуллиндер атындағы өнер училищесін тәмамдады. Балаларының айтуынша, өнерге келулеріне ата-аналары тікелей сеп болған.
«Халықтың қөшеметіне бөлені, жадырап күліп, күш жігері тасып көздерінен от көргеннен кейін мен де осы салаға тартылдым. Көрейік бізде қалай болар екен деген сұрақ мазалады. Ел ортасында жүріп несібеңді табу маған қызық көрінді. Әкемнен дарыған бұл қасиет демек біздің қанымызда бар. Талантты текке тәрк етпеу керек қой. Әкемнің ең жақсы қасиеті кез-келген жанмен тез тіл табысып, баурап әкетуі. Мейлі шопан болсын, мейлі полиция қызметкері болсын, кез-келгеннің тілін тез таба біледі. Және ортасында ерекше сыйлы азамат. Сол кезде «міне, нағыз өнер адамы осындай болу керек шығар» деп ойлаушы едім. Анамыздың да бойындағы өнерге деген махаббатты бала күнімізден бойымызға сіңіріп өстік. Домбыраның үнімен ұйықтап, домбыраның үнімен ояндық. Әлі күнге дейін қара домбыраның үні үзілген жоқ. Үзілмесе деп тілеймін» , - дейді кіші ұлдары.
Шаттығы шалқыған бұл шаңырақта отбасы мүшелерінің барлығы бір дастархан басын жиналған сәттерінде күмбірлеп күй тартылады, әуезді әндер әуелейді. Отағасы балдай тәтті немерелеріне музыкалық аспаптардан рухты оятатын әуезді әндерді шырқаса, шаңырақтың түтінін түтетіп отырған ана келіндеріне үнемі өмірден білген-түйгенін, ақыл-кеңесін айтып отырудан жалыққан емес.
Отбасы - мемлекеттің бір бөлшегі. Осындай үлгілі де өнегелі отбасылар мемлекеттің дамуы мен өркендеуіне елеулі үлес қосатыны анық.
