Тұрғындар ескі немесе жол апаты салдарынан жүруге жарамай қалған темір тұлпарларын өткізіп, өтемақы ала алуға мүмкіндік жасалды.
Тұрғындар істен шыққан көліктерді қаладағы қайта өңдеу бекетіне әкеледі. Дәл осы жерде қайта өңдеу үрдісі жүргізіледі. Өткен жылы шаһарда 1544 жеңіл көлік, 40 автобус, 10 жүк көлігі қайта өңделген. Айта кетерлігі, көлік үшін азаматтар өтемақы алады. Жеңіл көлік үшін 210 мың, автобус үшін 440 мың және жүк көлігі үшін 630 мың теңге.
«Қайта өңдеу үшін тұрғындар мамандандырылған халыққа қызмет көрсету орталығына барып, көлігін тіркеуден алып тастайды. Анықтама алады да, есепшот ашады. Сайт арқылы кезекке тұрады. Көліктің құрылымы тексеріледі, келісімшарт жасағаннан кейін 5 күн ішінде өтемақы есепшотқа түседі» дейді көлік қабылдау бекетінің өңірлік менеджері Станислав Кравченко. Көліктер қоршаған ортаға зиян келтіретін негізгі 3 фактордың қатарына кіреді. Ірі қалаларда көліктердің жыл санап көбеюіне байланысты атмосферадағы зиянды көміртектің үлесі күрт өскен. Осыған байланысты Энергетика министрлігі азаматтардан көлікті сатып алу және қайта өңдеу бағдарламасын ұсынған болатын. ШҚО экология департаментінің бас маманы Қаныбек Нұрғалиевтің сөзінше, 2021-і жылдың басынан бастап Өскемен және Семей қалаларында көліктерді қайта өңдеу бағдарламасы жанданды. Бұл бағдарламаның арқасында атмосфераға түсетін ауыртпашылық азаяды. Өздеріңіз білетіндей, ескі көліктердегі түтін шығару жүйесі қазіргі стандарттарға сай келмейді. Оның ішінде азот диоксидінің бөліну көрсеткіші өте жоғары. Ескі көліктің шуы да көп, табиғатқа да тигізер зияны аз емес», - дейді маман.
Ел бойынша көліктерді қайта өңдеу 4 жыл бұрын басталды. Алғашқы жылы 516 көлік қабылданса, кейінгі жылдары көрсеткіш 1500 көліктен асып жығылды. Барлық өңдеу процедурасынан өткен көліктер Қарағанды қаласындағы зауытқа жеткізіледі.
