Танымал жұлдыз Димаш Құдайберген неден күш пен жігер алатынын ашып айтты. Сонымен қатар өнер иесі үнемі алға жетелеп жүретін арманымен де бөлісті, деп хабарлайды Экспресс К.
Бұл туралы әнші тілшілерге берген кезекті сұхбаты кезінде айтты. Оның үзінді видеосын ТікТок қолданушысы өз парақшасында жариялады.
«Анамның қызық қасиеті бар. Күшті жаңалық айтатын болсаң, «құлыным» деп жылап бастайды. Аналарымыздың көз жасы қуаныштан шыққанда, кеудесіне бақыт сыймай күлген кезде, сөзбен айтып жеткізу мүмкін емес бір ерекше сезімге бөленемін», — деді Димаш Құдайберген.
Өнер иесінен жұртшылық «Неден стимул аласың?» деп сұрап жатады екен. Бұл сауалдың жауабын әнші былайша түсіндірді:
«Бірден айтайын, алға жетелеуші үлкен тылсым күш — ата-ананың қуанышы. Адам атаққа үйренеді, абыройға, тіпті халықтың махаббатына да үйренеді. Бірақ ата-анамның қуанып жүргені мен үшін ешқашан үйрене алмайтын нәрсе. Түйсігімде анамды қуантсам деген бір ой жүреді. Сол арман жетелеп жүр мені», — деді әнші.
Өнер жұлдызының бұл видеосын көрген желі қолданушылары оның тәлімді тәрбие алған ақылды адам екенін алға тартты.
«Ақылы көркіне сай. Тіл-көзден сақтасын; Өте шынайы адам; Қандай ақылды, сүйкімді. Әрқашан жолың ашық болсын; Балаларым осы жігіттей болсын; Алла разы болсын. Анаң әрдайым қуанып жүрсін; Тәрбие мықты. Аман бол», — деп жазды желі қолданушылары.
