Актер Ерболат Төлеген артық салмақпен 10 жылдай күрескенін жеткізді. Ол кейінгі 3 айда қалай арықтағаны туралы «Жұлдызды шаңырақта» бағдарламасында айтты, деп хабарлайды Massaget.kz тілшісі.
Актер сан жылдар бойы артық салмақтан қиналғанын айтты. Тіпті арнайы ақы төлеп, диетологпен арнайы жұмыс істеген.
«2009 жылы 100-120 келідей болдым. 2011 жылдан бері диета ұстап жүрмін. Былтыр өзіме аштық жарияладым, 15 күндей ештеңе жемедім. Тек су мен сорпа іштім. Оразадан кейін ешқайда барған жоқпын, 3 айдай үйде жаттым. Солай өзімде ретке келтіріп, арнайы диетолог мамандармен жұмыс істедім», ― дейді актер.
Өнер иесі арықтау үшін тамақтан бас тарту дұрыс емес екенін айтты. Оның сөзінше, күніне 7 рет тамақтанады.
«Мен қазір үш я болмаса бес рет емес, күніне 7 рет тамақтанамын. Аз тамақтансаң, арық боласың деген - өтірік. Аз-аздан күнделікті тамақтанып жүру керек. Бірақ енді қарайсыз ғой, тамақтың түріне де. Егер артық салмақ қосып алсам, бірден жаттығу залына барып, қайта өзімде ретке келтіремін», - дейді Ерболат Төлеген.
Актер, сондай-ақ, салмағы өзінің образына еш әсер етпегенін айтады. Қандай салмақ болмасын сахнаға Шімән апа болып шыға беретінін жеткізді.