Оңтүстік Қазақстан облысы әкімі аппаратының «Қоғамдық келісім» КММ-нің басшысы Е.Байқонақов 2015 жылы мекеме тарапынан атқарған жұмыстары туралы есеп берді.
Аталмыш мекеме облыс әкімдігінің 2014 жылғы 19 тамыздағы № 264 қаулысымен құрылған.Қазіргі кезде мекеме 71 штаттық бірлікте жұмыс жүргізеді. Сонымен қатар, мекемеде 4 бөлім бар. Олар: этносарлық қатынастар саласының ахуалдық мониторингі және талдау бөлімі, ғылыми зерттеулерді үйлестіру және әдістемелік әзірлемелер бөлімі, этномәдени бірлестіктермен жұмыс жүргізу бөлімі, қоғамдық-көпшілік іс-шараларды ұйымдастыру бөлімі.
Е.Байқонақовтың мәлімдеуінше, бұлардан бөлек 5 аудан, қалаларда филиалдар жұмыс атқаруда. Оларға 15 штаттық бірлік бөлінген. Мекеменің және бөлімдердің, филиалдардың жартыжылдық жұмыс жоспарлары жасалып, бекітілген.
Қазіргі кезде мекемеге 3 ғимарат қарайды. Олар: «Қоғамдық келісім» КММ, облыстық ардагерлер кеңесі және бұрынғы «Қазақстан» кинотеатры.
«Қоғамдық келісім» КММ Қазақстанда өмір сүріп жатқан барлық халықтың мәдениетін, тілін дамытуға қолайлы жағдай жасау бағытында Қазақстан халқының фестивальдерін, тілдер фестивальдерін, басқа этностардың мемлекеттік тіл мен ана тілін білу дәрежесін анықтайтын байқауларын, тіл саясаты мәселелері бойынша халықаралық және республикалық ғылыми-практикалық конференциялар мен семинарлар, т.б. өткізіп келеді. Ассамблея Кеңесінің мүшелері жетекшілік ететін республикалық, аймақтық, қалалық және аудандық этномәдени бірлестіктер жұмыс істейді. Ұйғыр, әзірбайжан, өзбек, корей, ингуш, неміс, чешен, поляк, т.б. этномәдени бірлестіктерінің жексенбілік мектептері бар», - деп атап өтті Оңтүстік Қазақстан облысы әкімі аппаратының «Қоғамдық келісім» КММ-нің басшысы Е.Байқонақов.
