Қызылорда облысы жастарының арасында IT жобалар байқауы өтті. Бұл байқауды Қызылорда облысының жастар саясаты мәселелері басқармасының «Жастар ресурстық орталығы» КММ және «Ашық азаматтық қоғам» ақпараттық-ресурстық орталығы ұйымдастырды. Аталған шара «Цифрлы Қазақстан» мемлекеттік бағдарламасын жүзеге асыру аясында өткізілді.
«Байқаудың мақсаты – жастардың IT саласына деген қызығушылығын арттыру арқылы білімдерін шыңдау», - дейді ұйымдастырушылар. Облыстық IT жобалар байқауында 50-ге жуық қатысушы бақ сынады. Байқау «Бағдарламалау немесе Smart City», «Робототехника», «3D модельдеу», «Мобильдік бағдарлама» бағыттары бойынша өтті.
«Қазіргі таңда IT саласына ерекше мән беріліп жатыр. Өйткені, біздің күнделікті тұрмыс-тіршілігімізге, дамуымызға бұл саланың тигізер пайдасы мол. Сондықтан, елімізде цифрландыру бағыты бойынша ауқымды жұмыстар атқарылып келеді. IT жобалар байқауына қатыса отырып, көптеген мағлұматтар алдық, біраз ізденіс жасап, білімімізді жетілдіре түстік. Облыстық IT жобалар байқауы жастар үшін пайдалы шаралардың бірі болды деп айта аламыз», - деп пікір білдірді байқауға қатысушы жастар.
Қатысушылар аталған бағыттар бойынша білімдерін ортаға салып, жүлделі орындарға ие болды. Мәселен, «Бағдарламалау немесе Smart City» бағыты бойынша үздік жұмыс көрсеткен Назерке Баймаханова бүгінгі қоғамды бағдарламалаусыз елестетудің мүмкін еместігін жеткізді. Робот құрастыруды сүйікті ісіне айналдырған Марат Ағзам болса, сайыстың «Робототехника» бағыты бойынша 1 орынды иеленді. Сондай-ақ, 3D модельдеу жұмыстарының ішінде Бауыржан Рахметовке ерекше баға берілді. Ал, Фариза Абдразақова мен Маржан Аяпованың бірлесе жасаған жұмысы «Мобильдік бағдарлама» бағыты бойынша үздік деп танылды.
